أثـرُ الفـ🦋ـراشَة | أُرَيَّا✨

بمناسبة البوست ده هحكيلكم عن موقف حصل معايا في المستشفى فعلًا ولسه فاكراه لحد دلوقتي 🥹

كان جالنا حالة قبل المغرب بحوالي 10 دقايق حرفيًا بنت عندها 18 سنة ولسه والدة من يوم واحد وجت الطوارئ بإغماء والدكتور كان بيتعامل معاها عادي وفجأة وإحنا واقفين جنبها لقيناها ازرقت مرة واحدة ودخلت في حالة Cardiac arrest واتنقلت فورًا لأوضة الـ CPR

أنا وقتها اتذهلت من الموقف لأنها كانت طبيعية معانا من شوية وفجأة كل ده حصل والطوارئ كلها اتحركت وأنا واقفة مش عارفة أعمل حاجة لأني مكنتش شوفت موقف زي ده قبل كده

دخل وقت المغرب فروحت أصلي وسمعت اللي حواليا بيقولوا إن حالتها صعبة وممكن متقومش ففضلت أدعيلها وأنا بصلي وكنت خايفة عليها جدًا لدرجة إني بعد الصلاة مكنتش قادرة أطلع من المكان غير لما خليت حد يسمعلي إذا كان فيه صريخ أو حاجة حصلت

والحمد لله نزلت وعرفت إن البنت عاشت وإن ضربات قلبها رجعت كويسة فرحت جدًا وقتها وفضلت أفكر لو كان حصلها حاجة يا ترى كان هيكون شعور والدتها إيه وطفلها اللي لسه جاي الدنيا يا ترى كان هيكون حاله إيه من غير أمه

بجد الشعور وقتها كان صعب أوي والموقف ده من المواقف اللي أثرت فيا فعلًا في المستشفى

الطبيب لازم يكون إنسان 🥹🤍

طبعًا لازم ناخد بالأسباب ونعمل اللي علينا لكن في الآخر الأمر كله بإيد ربنا وده المعنى اللي افتكرته لما شوفت الكلام ده 🤍

"كلُّ إنسانٍ آذاك أعطاك درسًا في التَّوحيد، خلاصته: اللَّه وحده هو الأمان".

ش/محمد خيري.

"فترة التربية الوطنية"

الفترة دي كانت من أصعب الفترات اللي مرت عليّا،
كنت بضطر أنزل الكلية لمدة أسبوعين متتالين ماعدا يوم الجمعة.

كان عندي التهابات مأثرة على دماغي ،ورؤيتي كانت مشوشة وكنت بمشي بالعافية غير البكتيريا اللي كانت في معدتي.
اللي هوا حرفيًا بايظة من كله😂

سجلت وقتها في التربية الوطنية لأن الليدر واللي أكبر مننا قالوا إنها إجباري السنة دي واللي مش هياخدها النتيجة بتاعته أخر السنة هتتحجب عنه.

كنت بروح طريق ٣ ساعات وبرجع نفس الـ ٣ ساعات+حضور المحاضرات والسكاشن.
أنا قلت خلاص هموت بعد اللي بيحصل فيّا ده.
افتكر كان في سكشن رسم في الفترة دي، أنا كنت واقفة برسم وفجأة قعدت على الكرسي وقعدت أعيط وصحابي هدوني وجابوا لي مسكن، بجد كنت في وضع لا أُُحسد عليه.

لحد ما جه اليوم ما قبل الأخير في الدورة..
وقتها العقيد قالنا هيعلم الكشاكيل (الشرح اللي كان بيشرحه لازم يبقى مكتوب)
كان ناقص أعيط يومها لأني مش كاتبة كلمة
أفتكر قعدت يجي٣ ساعات أنقل من صحابي اللي كتبوه وأنا شبه منهارة.

في الفترة دي وأنا خلاص شبه بموت حصل حاجتين خلوني أكون طايرة من السعادة وأقدر أقف على رجلي من تاني.

أول موقف
كنت راجعة من الكلية بعد يوم طويل ومُرهق لقيت رقم غريب بيرن عليّا
بفتح وأنا في وسط دوشة المواصلات ودماغي مصدعة لقيت واحدة بتقولي "أنا من تيم دكتور أحمد الجوهري وبوكس الأوائل هيوصل لكِ النهاردة"
وقتها فرحت جدًا وحسيت إنها حاجة جت تربط على قلبي.

تاني موقف
وهو يوم تعليم الكشاكيل في التربية الوطنية..
رايحة بكشكولي اللي رغم محاولاتي الكتيرة مخليش فيه حاجة ناقصة كان عندي بعض النواقص
روحت وكنت خايفة العقيد ينقصني أو حاجة.
لقيته بيسألني عن اسمي قولتله "منة الله"
قام كاتبلي كده في كشكولي
كنت طايرة وقتها بجد من الفرحة.

وخلصت الدورة بكل تعبها وألمها والامتحان اللي مكنتش محضرة ليه
بـ تقدير"جيد جدًا"
وأول سنة في الكلية اللي قضتها تعب وكشوفات ومواصلات خلصت وعدت بكرم ربنا.
فالحمد لله دائمًا وأبدًا 🤍

°°

دايمًا اسعى ومتقولش مش قادر أو الوقت فات واوعى تقول ربنا مش هيكرمني، ربنا كريم أوي..

ومتستناش نتيجة لأن مش دايمًا نتيجة تعبك هتكون في الدنيا ممكن تكون في الآخرة عادي
أنت مطلوب منك السعي بس

﴿وَأَن لَيْسَ لِلْإِنسَانِ إِلَّا مَا سَعَى () وَأَنَّ سَعْيَهُ سَوْفَ يُرَى﴾


- منة الله

أشدُّ أنواع الوَعي

تلك التي تولَدُ بعد صدمةٍ قويَّة،
حين يكون الإنسان في قمَّةِ عفويَّتِه🥀.